العودة مرة أُخرى

 بتوحشني حياتي زمان لما كنت بكتب مقالات

أنا أخر مقال كتبته كان من أكتر من 200 يوم.
تخيل يا صحبي أخر مرة كنت فاضي إني أكتب حاجة كانت من حوالي 200 يوم.

بس والله بعد كل دا الواحد جرب حاجات كتير هحاول احكيلكم كام تجربة.

الجدول

1.الجدول

الجدول في الفترة الأخيرة رجعت تاني للورقة والقلم والنوت وتتبع العادات لاني وقفت من وجهة نظري وقفت بسبب التشتت في ناس كتير تقول ان notion برنامج حلو اوي للتنظيم وناس تقول أن tick tick أحسن برنامج تتبع عادات بس الحقيقة ان مفيش احسن من الورقة والقلم
مع كتر البرامج وتضخيم كل حاجة مش الطف حاجة نهائي هتحس نفسك متأخر ومش منجز وان الدنيا بتجري من حواليك وانت واقف فى مكانك
ف الدرس الأتعلمته هنا ان الدنيا بسيطة خالص حاول تبسطها أكتر يعني نظامي حاليا بسيط ورقة ونوت صغيرة ولو حاجة مهمة ف google keep مقصرش معايا فى اي حاجة

الفون

2. البعبع الكبير اوي التلفون يا صحبي

ودا محتاج كلام كتيير اوي اوي لوحدو بس هحاول اتكلم عن تجربتي

اول حاجة وهي كانت زي ضربة ع الوش كدا وهي الاستخدام الاسبوعي للتلفون وصل لأكتر من 8 ساعات يومياً يالله هنا كانت وقفة وياا الله منها بجد.

كان نفسي دلوقتي اقولك ان انا دلوقتي استخدامي وصل لساعة في اليوم بس اخر اسبوع وهو الأسبوع (32) وصل استلاكي للتلفون بمعدل 3 ساعات يومياً.

بس الصراحة اني مشغلتش نفسي ف ان ازاي اققل وقت التلفون بس أنا كل حاجة فكرت فيها عاداتي وان احط عادات جديدة او مش جديدة بس مفيدة.

ف الدرس هنا اشغل نفسك في اي حاجة اشتغل اتمرن ادرس اتعلم اعمل اي حاجة يا صحبي اي حاجة اشغل وقتك

السوشيال ميديا

3. السوشيال ميديا

امسحها اي فايدة انستجرام يا صحبي تشوف صور الموديلز والناس المفيهاش غلطة واحدة امسحها وحاول تعيش علشان تعيش وفيسبوك اي الفايدة منو لو مش هتشتغل منه حاول تستخدم الحاجة التعرف تطلع منها فلوس او تطلع منها بفايدة او معلومة تخليك تجيب فلوس
وبلاش تستهلك محتوي علي الفاضي من غير اي فعل ، حتي لو المحتوي مفيد بلاش ييقي استماع فقط اسمع واشتغل واي معلومة تسمعها اكتبها واعمل بيها

اتعلم

4. اتعلم حاجة

اتعلم حاجة تفيدك في حياتك لو مش عارف تتعلم اي اتعلم انجليزي دي اول واهم حاجة بقولك انها مهمة في اي حاجة وانا مش بقولك كدا وانا معايا C1 انا معاك انا ف الصفر يا صحبي ، أتعلم اي حاجة اتعلم وخلاص

دون

5. التدوين

مش لازم تدون كل يوم بس دون واكتب مشاعرك واحاسيسك وكل كلام عايز تقولو ومش عارف طلع الجواك

اقرء

6. القراءة

الكتاب هو الصاحب المش هيمل منك ولا انت هتمل منه القراءة مينفعش مينفعش متبقاش ف يومك انا كان في اسبوع كدا مقرتش فيه بس رجعت تاني الحمدلله للقراءة من تاني

المصحف

7. القرآن

القرآن لازم يبقي جزء لا يتجزء من يومك يا صحبي كل يوم الصبح حزب مش هياخد من وقتك دقايق

8.الأذكار والصلاة اكيد دول من اساسيات مش هنتناقش فيها

وأظن أظن ان دي الحاجات البحاول اني أواظب عليها في روتيني الغير مثالي والغير متكامل

ومن مكاني هنا أحب اقول ان مع الوقت هيبقي في مقالات اسبوعية ونشرات إلكترونية وفيديوهات علي اليوتوب وهنكون علي كل مواقع التواصل علي فيس بوك وانستجرام ان شاء الله لنا عودة بس هتكون تدريجية بسبب اولويات
وبس يا صحبي اتمني اكون وحشتك زي منتا وحشتني وتكون بتحبني زي منا بكتبلك بكل حب ولو عايز تتابعني علي اي موقع هتلاقي كل حسابتي تحت وبس كدة

فيس بوك

إنستجرام

يوتيوب

قناتنا علي الواتساب

يحيى